Pag-ibig Na Naman

“Pag-ibig na naman, lagi naman ganyan,

Ang daming sinasabi; walang kapaguran,

Puro ka ganito, puro ka ganyan,

May pinaghugutan ka ba o imbento mo lang yan?

Pag-ibig na naman, paulit-ulit ka na lang,

Hanap ka ng hanap, ikaw yatang kulang-kulang,

Ikaw ‘tong nagrereklamo, ikaw ang gumalaw,

Sa pinili mong musika ikaw ang sumayaw,

Pag-ibig na naman, hindi ka na nagsawa,

Sa puso mong napapaos, hindi ka na naawa,

Sa utak mong pagod na walang nararating,

Isip ka ng isip, aba’y galaw-galaw din,

Pag-ibig na naman, katulad ng iba,

Pare-pareho lang silang walang pinagkaiba,

Akala mo kung sinong nagmamagaling,

Akala mo aliping daing ng daing,

Pag-ibig na naman, natuto ka na siguro,

Pero iba pa rin ang feeling kapag ikaw na mismo,

Wag matakot maramdaman, lahat tayo dadaan dyan,

Paikot-ikot lang yan, o Pag-ibig nga naman..”